ਗ਼ਜ਼ਲ

ਐ ਪਿਆਰ ਤੈਨੂੰ ਸਿਜਦਾ, ਕਰਦਾ ਹਾਂ ਸਿਰ ਝੁਕਾ ਕੇ 
ਮੰਗਦਾ ਆਂ ਖ਼ੈਰ  ਤੇਰੀ,  ਦਰ  ਆਸ਼ਕਾਂ ਦੇ  ਜਾ  ਕੇ |

ਇਹ ਸੋਚ ਮੇਰੇ ਦਿਲ ਨੂੰ, ਖਾਂਦੀ  ਏ ਘੁਣ ਦੇ ਵਾਂਗਰ
ਕਿਉਂ  ਦੂਰ  ਹੋ  ਗਏ ਨੇ, ਉਹ  ਕੋਲ  ਮੇਰੇ  ਆ  ਕੇ |

ਹੈ  ਪੀ  ਗਿਆ ਜਦੋਂ  ਦਾ, ਉਹ  ਸੀਰਮੇ ਦਿਲਾਂ 'ਚੋਂ 
ਉਹ ਰੋਜ਼ ਤੇ ਇਹ ਹੁਣ ਦਾ, ਸੌਂਦਾ ਹਾਂ  ਰਾਤ ਪਾ ਕੇ |

ਕੋਸ਼ਿਸ਼ ਕਰੀਂ ਕਿ ਤੈਨੂੰ , ਕਦੀ ਯਾਦ ਮੈਂ ਨਾ ਆਵਾਂ
ਰੱਖੀਂ  ਨਾ  ਕੰਧ  ਉੱਤੇ,  ਤਸਵੀਰ  ਮੇਰੀ   ਲਾ  ਕੇ |

ਹੁਣ ਛੱਡ ਗਏ ਨੇ ਮੇਰੇ, ਉਹ ਸੁਫ਼ਨਿਆਂ 'ਚ ਆਉਣਾ 
ਜੋ  ਹੋ  ਗਏ  ਪਰਾਏ, ਮੈਨੂੰ  ਆਪਣਾ   ਬਣਾ   ਕੇ |

ਮੋਤੀ  ਵੀ  ਕੋਈ  ਏਦਾਂ, ਨਾ  ਦਾਨ  ਹੋਣ  ਮੈਨੂੰ 
ਜਿੱਦਾਂ ਕਿ  ਹੋਏ ਹੰਝੂ, ਕੋਈ  ਗੀਤ  ਮੈਨੂੰ ਗਾ ਕੇ |

(ਸੰਨ 1993)